Երևանում ինտերնետիզացիայի ծավալներն աճում են

Նախնական տվյալների համաձայն՝ Երևանում համակարգչից և ինտերնետից օգտվողների թիվը մեկ տարվա ընթացքում ավելացել է գրեթե եռակի և կազմել 18 տոկոս, հինգշաբթի «Նովոստի» միջազգային մամուլի կենտրոնում տեղի ունեցած մամուլի ասուլիսի ժամանակ ասել է «Ձեռնարկությունների ինկուբատոր» հիմնադրամի (Enterprise Incubator Foundation- EIF) տնօրեն Բագրատ Ենգիբարյանը:

Նա նշել է, որ EIF-ն սկսել է ուսումնասիրություններ իրականացնել Հայաստանում ինտերնետից և համակարգչային տեխնիկայից օգտվելու վերաբերյալ, որի արդյունքները նախատեսվում է ամփոփել երեք ամիս հետո:

«Արդեն նախնական՝ ոչ պաշտոնական տվյալների համաձայն՝ եթե Երևանում համակարգչից և ինտերնետից օգտվողների թիվը մեկ տարի առաջ 6 տոկոս էր, ապա արդեն այժմ այն կազմում է ավելի քան 18 տոկոս», – ասել է Ենգիբարյանը:

Նրա խոսքերով՝ օգտվողների նման ցածր ցուցանիշը պայմանավորված է նրանով, որ էլեկտրոնային հասարակության զարգացումն անհնար է առանց կառավարության անմիջական մասնակցության, իսկ «Հայաստանը երկար մտածելուց հետո միայն 2009 թ.-ին որոշում ընդունեց նախաձեռնել էլեկտրոնային հասարակության ստեղծումը»:

Մասնավորապես, կառավարությունը նախաձեռնել է երկու լուրջ ծրագիր, որոնք հավական է, որ կմեկնարկեն 2010 թ.-ին՝ լայնամասշտաբ ինտերնետ ցանցի կառուցումն ու «Համակարգիչ բոլորի համար» ծրագիրը:

«Այս ծրագրերի իրագործումը թույլ կտա գրանցել օգտագործողների աճ երկրաչափական պրոգրեսիայով: Միաժամանակ այդ նախաձեռնություններն ուշացել են, քանի որ եթե մենք սկսեինք գործընթացը 7-8 տարի առաջ՝ այլ երկրների հետ միասին, ապա այսօր երկրում տիրող իրավիճակը շատ ավելի լավ կլիներ», – ասաց Ենգիբարյանը:

«Տնտեսություն և արժեքներ» հետազոտական կենտրոնի նախագահ Մանուկ Հերգնյանն իր հերթին նշեց, որ ինտերնետից օգտվողների 6 տոկոսանոց ցուցանիշը չի արտացոլում իրականությունը, քանի որ կենտրոնի կողմից անցկացված ուսումնասիրությունների համաձայն՝ միայն Երևանում ինտերնետից օգտվողների թիվը կազմում է 30 տոկոս:

Միաժամանակ, նրա խոսքերով, այդ ցուցանիշը կարող է կտրուկ աճել՝ հաշվի առնելով բջջային ինտերնետի բաժանորդների թիվը:
Տարբեր միջազգային փորձագետների տվյալների համաձայն՝ Հայաստանում համակարգչայնացման մակարդակը կազմում է շուրջ 5-10 տոկոս:

Աղբյուրը` ԱՌԿԱ-Տելեկոմ