U!com. ֆիքսված հեռախոսներից հնարավոր կլինի SMS ուղարկել
July 31, 2010 | Բաժիններ` Հայկական ինտերնետ, Մոբիլ նորություններ, Վերահրապարակումներ
Մի քանի ամսից U!com-ը կգործակի նոր ծառայություն` ֆիքսված հեռախոսակապ, որը նոր սերնդի ծառայություն է և կլինի առաջինը Հայաստանում:
U!com. ֆիքսված հեռախոսներից հնարավոր կլինի SMS ուղարկել
Այս պահին ընկերությունը մատուցում է դեռևս երկու ծառայություն` ինտերնետ և IP հեռուստատեսություն: «Լինելու է նոր համարային շարք` 060 կոդով, և ընձեռվելու է բոլոր օպերատորների բաժանորդներին և բոլոր ուղղություններով զանգելու հնարավորություն: Միանշանակ շուկա մտնելու դեպքում մենք սակագնային առումով գրավիչ առաջարկներ կանենք»,- PCNews.am-ի թղթակցին ասաց U!com-ի գլխավոր տնօրեն Հայկ Եսայանը:
Ֆիքսված հեռախոսակապի առանձնահատկությունը այն է լինելու, որ այն ընձեռելու է ոչ միայն հաղորդագրություն թողնելու (voice messaging), այլև տան հեռախոսից SMS ուղարկելու հնարավարություն: Արդեն մատուցվող IP հեռուստատեսությունը նույնպես նոր սերնդի ծառայություն է և տարբերվում է ներկայիս հեռուստատեսությունից: Այն թույլ է տալիս 24 ժամվա ընթացքում յուրաքանչյուր ալիք ետ տալ և դիտել ժամեր առաջ հեռարձակված հաղորդումները:
«Կա նաև ֆիլմերի վարձակալության հնարավորություն. ցանկացած ֆիլմ կարող եք ընտրել և դիտել` վճարելով սկսած 300 դրամից»,-նշեց տնօրենը: IP հեռուստատեսությունը գործարկվել է 4 ամիս առաջ`2010թ. ապրիլին: Տնօրենի խոսքով` հաճախորդների մեծ աճ է գրանցվել ընկերության առաջարկած ամառային ակցիայի արդյունքում, ըստ որի` բաժանորդը, որը կսկսի օգտվել ինտերնետից կամ հեռուստատեսությունից, ապա մյուս ծառայությունը կստանա անվճար` մեկ ամիս ժամկետով:
U!com-ի ծառայությունները տրամադրվում են ընկերության նոր սերնդի FTTH (Fiber To The Home) ցանցի շնորհիվ, որի հիմքում ընկած է Ericsson ընկերության GPON (Gigabit Passive Optical Network) տեխնոլոգիական լուծումը: Տեղադրվող սարքի օգնությամբ բաժանորդները ստանում են 1024 Մբթ/վ (1 Գբթ/վ) թողունակությամբ օպտիկամանրաթելային կապուղի և ինտերնետային կապի մինչև 10 Մբթ/վ արագություն: «Այս պահի դրությամբ աշխատանքներ են տարվում Արաբկիր, Քանաքեռ-Զեյթուն նաև Ավան համայքներում: Սեպտեմբեր ամսվա ընթացքում ծառայությունները կգործարկվեն Արաբկիրում և Քանաքեռ-Զեյթունում: Մինչև տարեվերջ U!com-ի ծառայությունները հասանելի կլինեն Ավանում և Նոր Նորքում»,-տեղեկացրեց Հ.Եսայանը:
U!com-ը ինտերնետը ստանում է GNC-Alfa և FIBERNET COMMUNICATION ընկերությունների կողմից, և կապուղիների վարձակալման միջոցով ինտերնետը մատակարարվում է Վրաստանից ու Իրանից: Եթե մի ուղղությամբ տեխնիկական խնդիրներ են լինում, ապա աշխատում է մյուսը: Ինտերնետից օգտվողների ամենամեծ աճը գրանցվել է հունիսին, որը պայմանավորված էր Դավիթաշենում ծառայությունների գործարկմամբ:
Այժմ ընկերությունը հատել է 2500 բաժանորդի շեմը: Տնօրենի խոսքով` այժմ ընկերությունն իր ունի 100.000 և ավել բաժանորդի ծառայություններ մատուցելու հնարավորություն: «Ինտերնետը Հայաստանում բավական արագ տեմպերով է զարգանում. եթե 2000թ. Հայաստան մտնում էր ընդամենը 2 մեգաբիթ արագություն, ապա այժմ` 5000-6000 մեգաբիթ արագություն, նախորդ տարվա հետ համաեմատած` գրեթե 2 անգամ ավել աճ է գրանցվել, իսկ դա պայմանավորված է բաժանորդների թվի մեծացմամբ»,-ասաց Հ.Եսայանը:
U!com ընկերությունը ստեղծվել է 2007թ., օպտիկամանրաթելային ծառայությունները սկսել են գործել 2009թ. ապրիլից: Այժմ ընկերությունն ամբողջությամբ սպասարկում է Կենտրոն և Դավիթաշեն համայնքները:
Այլ նորություններ
Նյութի դիտումների քանակը` 365
