ArmeniaMobile.net - Armenian mobile news & reviews » հայկական բջջային օպերատորներ

Հայաստանի բջջային օպերատորները ավելի քան 20%-ով նվազեցրել են վճարված հարկերը

Administrator — Wed, 10 Aug 2011 21:00:06 +0000

Հայաստանի 3 բջջային օպերատորները 2011 թվականի առաջին կիսամյակում 13,6 մլրդ. դրամի հարկ են վճարել, ինչը 3,7 մլրդ-ով կամ 21,4%-ով զիջում է 2010 թվականի նույն ժամանակահատվածի ցուցանիշին:

Հայաստանի բջջային օպերատորները ավելի քան 20%-ով նվազեցրել են վճարված հարկերը

Առաջին կիսամյակի արդյունքներով 100 խոշորագույն հարկատուների ցանկում են 4 հեռահաղորդակցության ընկերություններ:

Ինչպես հաղորդում է Մեդիամաքսը, «ԱրմենՏել» ընկերությունը (Beeline ապրանքանիշ) 4-րդ տեղն է զբաղեցրել վճարված հարկերի ծավալով: Ընկերության կողմից առաջին կիսամյակում վճարված ընդհանուր գումարը 6 մլրդ 854 մլն 706,6 հազ. դրամ է կազմել` 2010 թվականի I-ին կիսամյակի համեմատ նվազելով 6%-ով (424 մլն):

7-րդ տեղում «Ղ-Տելեկոմ» ընկերությունն է (VivaCell-MTS ապրանքանիշ), որը վճարել է 4 մլրդ 754 մլն 075,2 հազ. դրամի հարկ (2,5 մլրդ-ի կամ 34,6%-ի նվազում):

Առաջին կիսամյակի արդյունքներով 11-րդ տեղը զբաղեցրել է «Օրանժ Արմենիա» ընկերությունը, որը 2 մլրդ 52 մլն 827,5 հազ. դրամ է վճարել (27,4% կամ 776,2 մլն դրամի նվազում):

Ցանկի 88-րդ տեղում է ինտերնետ-օպերատոր Ջի-Էն-Սի Ալֆա ընկերությունը (449 մլն 917,5 հազ. դրամ):

«Օրը փոխվում է Orange-ի հետ» – նոր ստորագրություն

Administrator — Wed, 29 Jun 2011 11:41:58 +0000

Այսօր Orange Armenia-ն ներկայացրեց ընկերության գործունեության առաջիկա տարիների փիլիսոփայությունը և նոր ստորագրությունը` «օրը փոխվում է Orange-ի հետ»: Այսպիսով Orange Հայաստանը միանում է աշխարհի բազմաթիվ երկրներում գործող քույր ընկերություններին, որով արտահայտում է Orange-ի խոստումը ժողովրդականացնել հեռահաղորդակցության ժամանակակից միջոցները, հեշտացնել մարդկանց կյանքը և մատուցել բարձրորակ ու նորարար ծառայություններ:

«Օրը փոխվում է Orange-ի հետ». Ընկերությունը ներկայացրեց իր նոր ստորագրությունը

Տեղեկատվական տեխնոլոգիաների զարգացմանը զուգահեռ փոխվում է այն դերը, որ խաղում է շարժական կապի օպերատորը հասարակությունում: Այսօրվա աշխարհը, որն ավելի ու ավելի «թվային» է դառնում, երբ բիզնեսի ու անձնական կյանքի կազմակերպման անփոխարինելի մասն են դառնում հեռահաղորդակցության միջոցները, Orange-ը ցանկանում է լինել և անել ավելին իր բաժանորդների համար. ուղեկցել իր բաժանորդներին թվային աշխարհում, դառնալ նրանց աջակիցն ու օգնականը արագորեն զարգացող հեռահաղորդակցության աշխարհում: Այս մասին նշվում է ընկերության տարածած հաղորդագրության մեջ:

«Այսօր մենք մեր բաժանորդների ամենօրյա կյանքի անբաժան մասն ենք կազմում: Սա մեծ պատասխանատվություն է և միաժամանակ մեծ ոգևորություն, քանի որ կարող ենք մասնակցել և դեպի լավը փոխել նրանց առօրյա կյանքը: Այսօր մարդիկ վայրկենաբար փոխանակում են իրենց նորությունները, նկարները, կարդում և դիտում են վերջին լուրերը, տեղեկանում են հեռվում գտնվող ընտանիքի անդամներից, շփվում են սոցիալական ցանցերում, հեռուստացույց են դիտում փողոցում քայլելիս, ու մենք երջանիկ ենք տալ նրանց այդ հնարավորությունները մեր ցանցի, գիտելիքների, փորձի ու աշխատանքի շնորհիվ: Փոփոխություն բերել մեր բաժանորդների կյանքում, նույնիսկ այնտեղ, որտեղ նրանք չէին ակնկալում. սա է մեր բոլոր աշխատակիցների ամենօրյա աշխատանքը», ասում է Orange Արմենիայի գլխավոր տնօրեն Բրունո Դյութուան:

Orange-ը Հայաստանում իր գործունեության կարճ ժամանակահատվածում արդեն կարողացել է շոշափելի փոփոխություններ իրականացնել կամ դրանց կատալիզատորը դառնալ: 2009թ.-ի համեմատ ընդամենը մեկ ու կես տարում լայնաշերտ ինտերնետի բաժանորդների քանակն աճել է ավելի քան 2 անգամ: Orange-ի 3G+ ցանցը ծածկում է Հայաստանի բնակչության 96%-ը, որի շնորհիվ երկրի բազմաթիվ հեռավոր բնակավայրեր առաջին անգամ մուտք ունեցան դեպի լայնաշերտ ինտերնետ: Orange-ը նաև բերեց եվրոպական օպերատորի մշակույթը կորպորատիվ հովանավորության ու բարեգործության ոլորտ` կարևոր դեր ստանձնելով բաժանորդների ժամանցի, կրթության, ինտերնետի օգտագործման և այլ հարցերում: Միաժամանակ ընկերությունն իր բազմաթիվ նախագծերի շնորհիվ խրախուսել և շարունակելու է խրախուսել ՏՏ և հեռահաղորդակցության ոլորտի շնորհալի երիտասարդներին` նրանց բոլորին տալով ինքնադրսևորվելու և ստեղծագործելու հնարավորություններ:

«Օրը փոխվում է Orange-ի հետ» կարգախոսը շեշտում է այն բոլոր փոքր ու մեծ առևտրային կամ կորպորատիվ նախաձեռնությունները, որոնք փոխում են բաժանորդների կյանքը յուրաքանչյուր օր:

«Մեր նոր ստորագրությունը նաև աշխարհայացք է և խոստում. սա խոստում է լինել բաժանորդի կողքին ամեն օր և ամենուր: Այն ծառայությունները, որ մենք մշակել ենք և նրանք, որ դեռ մշակելու ենք, միշտ մտածված են լինելու հեշտացնել, պարզեցնել ու գեղեցկացնել բաժանորդների կյանքը, լինի դա սիրելիի հետ շփվելը, թե կինո գնալը: Մեր նպատակն է դառնալ բաժանորդների ուղեկիցը թվային աշխարհում», նշում է Orange-ի մարքեթինգի տնօրեն Արամ Մկրտչյանը:

Աղբյուրը` 1in.am

Orange-ը ծածկույթը հասանելի է Հայաստանի բնակչության 95%-ին

Administrator — Wed, 26 Jan 2011 14:15:35 +0000

Orange-ը շարունակում է ընդլայնել ծածկույթը և ցանցի թողունակությունը` այսօր արդեն իր ձայնային և ինտերնետ ծառայությունները հասանելի դարձնելով Հայաստանի բնակչության 95%-ին, ասվում է ընկերության մամլո հաղորդագրության մեջ:

Հայաստանի բնակչության արդեն 95%-ը Orange-ի ծածկույթում է

Ցանցի ընդլայնման վերջին աշխատանքների շնորհիվ Orange-ի ծառայությունները` ներառյալ շարժական ինտերնետը, արդեն հասանելի են բազմաթիվ փոքր բնակավայրերում, հատկապես Շիրակի, Լոռու, Տավուշի, Արագածոտնի, Սյունիքի մարզերում: Ցանցի ուժեղացման և ընդլայնման աշխատանքներ են կատարվել նաև Հայաստանի հյուսիսային և հարավային ավտոմայրուղիների վրա:

«Ինչպես խոստացել էինք, մենք այսօր արդեն ապահովում ենք շարժական կապի ծառայություններ Հայաստանի բնակչության 95%-ին: Ծածկույթի ընդլայնումն ու բարելավումը մեր ամենակարևոր նպատակներից ու ձեռքբերումներից է, որի նպատակն է ինչպես առավելագույն հարմարավետություն ապահովել մեր ներկա բաժանորդների համար, այնպես էլ նոր ընտրություն առաջարկել նոր հաճախորդների», ասաց Orange-ի գլխավոր տնօրեն Բրունո Դյութուան:

Աղբյուրը` PanArmenian.net

Հայաստանի բնակչության 86 տոկոսն օգտվում է բջջային կապից

Administrator — Sat, 08 Jan 2011 14:28:19 +0000

Հայաստանի տրանսպորտի եւ կապի նախարար Մանուկ Վարդանյանը NEWS.am-ին տեղեկացրեց, որ 2010 թ. վերջի դրությամբ «ԱրմենՏել»-ի ֆիքսված հեռախոսակապի բաժանորդների թիվը կազմում է ավելի քան 620 հազ., այդ թվում՝ Երեւան քաղաքում` ավելի քան 530 հազ. բաժանորդ:

Հայաստանի բնակչության 86 տոկոսն օգտվում է բջջային կապից

Իսկ երեք օպերատորների (Armentel, VivaCell-MTS, Orange Armenia) մատուցած բջջային կապի ծառայություններից իրապես օգտվում են ավելի քան 2.77 մլն բաժանորդ կամ Հայաստանի բնակչության 86 տոկոսը:

2010 թվականի ընթացքում տեղի է ունեցել ոլորտում արդի տեխնոլոգիաների ինտենսիվ ներդրում, այդ թվում՝ ընդլայնվել են 3G ստանդարտով գործող համակարգերը՝ հանրապետության ողջ տարածքում ապահովելով 100 տոկոսանոց ծածկույթ։

Ըստ Մ. Վարդանյանի՝ միաժամանակ նկատվում է սակագնային քաղաքականության ճկուն կիրառում՝ գործնականում ապահովելով նվազագույն սակագներ եւ համընդհանուր հասանելիություն:

Նախարարն ասաց, որ ներկայումս իրականացվում են աշխատանքներ հանրապետության տարածքում 4G ստանդարտի տեխնոլոգիաների ներդրման եւ գործող համակարգերի տեխնիկական վերազինման մասով:

News.am

ՎիվաՍել-ՄՏՍ-ի «Բջջային հեռուստատեսություն» ծառայությունն` այժմ ավելի մատչելի

Administrator — Fri, 10 Dec 2010 20:20:16 +0000

Մինչև 2011թ. հունվարի 31-ը ՎիվաՍել-ՄՏՍ-ի «Բջջային հեռուստատեսություն» ծառայության իրական ժամանակում հեռարձակվող ալիքների «Basic» փաթեթի սակագինը կկազմի 1 օրվա համար ընդամենը 100 դրամ` նախկին 400 դրամի փոխարեն, հաղորդում է ՎիվաՍել-ՄՏՍ ԲԲԸ մամլո ծառայությունը:

ՎիվաՍել-ՄՏՍ-ի «Բջջային հեռուստատեսություն» ծառայությունն` այժմ ավելի մատչելի

Աղբյուրը` PanArmenian.net

Հայկական ցանցում բջջային օպերատորներին բաժին է ընկնում գովազդի 60%-ը

Administrator — Sun, 05 Dec 2010 13:36:14 +0000

Հայաստանի Ինտերնետ-գովազդի 60% բաժին է ընկնում երեք բջջային օպերատորներին` ՎիվաՍել-ՄՏՍ, Orange Armenia և «ԱրմենՏել»: Այդ մասին PanArmenian.net ի թղթակցի հետ զրույցում հայտնեց SP Marketing Solutions-ի էլեկտրոնային մարքեթինգի բաժնի ղեկավար Ժիրայր Թերզյանը:

Advertising on Armenian internet

Նրա խոսքով, Ինտերնետ-գովազդով հետաքրքրված են նաև բանկերը: Հայաստանում օնլայն-գովազդի ոլորտում ամսական շրջանառությունը կազմում է մոտ 9 մլն դրամ` չհաշված հայկական գովազդն արտասահմանյան ռեսուրսներում: Ինչ վերաբերում է Ինտերնետում գովազդի տեսակներին, ապա Հայաստանում, փորձագետի խոսքով, առավել մեծ պահանջարկ է վայելում գովազդի դիմաց վճարելը որոշակի ժամկետի համար:

Մինչդեռ կոնտեքստային գովազդի ծառայություններ տրամադրող AdBook ընկերության բաժինը կազմում է 5-10%:

Աղբյուրը` PanArmenian.net

Opera Software-ը Հայաստանի բջջային օպերատորներից մեկի հետ համագործակցության մասին բանակցություններ է վարում

Administrator — Sun, 05 Dec 2010 13:30:26 +0000

Opera mini բջջային բրաուզերի արտադրող Opera Software ընկերությունը Հայաստանի բջջային օպերատորներից մեկի հետ համագործակցության մասին բանակցություններ է վարում:

Opera Software-ը Հայաստանի բջջային օպերատորներից մեկի հետ համագործակցության մասին բանակցություններ է վարում

Թե որ օպերատորի հետ են ընթանում բանակցությունները, առայժմ չի հայտարարվում: Այդ մասին PanArmenian.net ի թղթակցի հետ զրույցում հաղորդեց ԱՊՀ-ում Opera Software ընկերության հաղորդակցության գծով մենեջեր Վլադիմիր Իսաևը: Նրա խոսքով, Opera Software CIS-ին արդեն հաջողվել է Ռուսաստանի, Ուկրաինայի և Բելառուսի կապի 5 օպերատորների հետ կնքել պայմանագրեր, որոնց շրջանակներում բաժանորդները կարող են անսահմանափակ բջջային Ինտերնետին միանալ Opera mini-ի միջոցով: Հաջող բանակցությունների դեպքում նույնպիսի ծառայություն հասանելի կլինի նաև Հայաստանում:

Աղբյուրը` PanArmenian.net

VivaCell-MTS. մեկ տարում բաժանորդների 8.9% աճ

Administrator — Thu, 02 Dec 2010 21:24:07 +0000

Վիվասել-ՄՏՍ բջջային օպերատորը ս.թ. հոկտեմբերի 31-ի դրությամբ գրանցել է 2 մլն 220 բաժանորդ: Այսպիսի տվյալներ է հաղորդում «Բջջային Հեռահամակարգեր» ԲԲԸ-ի (ՄՏՍ) հոկտեմբերյան հաշվետվությունը: 2009թ. նույն ժամանակահատվածի համեմատ` ՎիվաՍել-ՄՏՍ-ի բաժանորդների քանակն ավելացել է 8.9%-ով:

Մեկ տարում ՎիվաՍել-ՄՏՍ-ը գրանցել է բաժանորդների 8.9% աճ

«Բջջային Հեռահամակարգեր» ԲԲԸ-ը (ՄՏՍ)Դուստր ձեռնարկությունների հետ միասին կազմակերպությունը սպասարկում է ավելի, քան 100 միլիոն բաժանորդի: «ՄՏՍ»-ը ծառայություններ է մատուցում Ռուսաստանի 82 տարածաշրջաններում, Հայաստանում, Բելառուսում, Ուկրաինայում, Ուզբեկստանում և Թուրքմենստանում: 2000թ-ից «ՄՏՍ»-ի բաժնետոմսերը գնանշված են Նյու Յորքի բորսայում MBT ծածկագրի տակ:

Աղբյուրը` PCNews.am

Beeline-ի 096 կոդով հեռախոսահամարները կվաճառվեն դեկտեմբերի 2-ից

Administrator — Wed, 01 Dec 2010 21:07:19 +0000

«ԱրմենՏել» ՓԲԸ-ն (ապրանքանիշը` Beeline) հայտարարում է 096 կոդով Beeline բջջային ցանցի հեռախոսահամարների վաճառքի մեկնարկի մասին: Հեռախոսահամարը կարելի է ձեռք բերել Beeline վաճառքի և սպասարկման ցանկացած գրասենյակներում:

Beeline-ի 096 կոդով հեռախոսահամարները կվաճառվեն դեկտեմբերի 2-ից

Այն հաճախորդներն, ովքեր www.beeline.am կայքում լրացրել են 096 կոդով հեռախոսահամար գրանցելու համապատասխան հայտը, կարող են ձեռք բերել ամրագրած համարը մինչև 2010թ-ի դեկտեմբերի 9-ը ներառյալ, հաղորդում է ընկերության մամլո ծառայությունը:

Beeline վաճառքի և սպասարկման գրասենյակներում գնելով բջջային հեռախոս` հաճախորդը կստանա նվեր «գեղեցիկ համար»: 100000 դրամից ցածր արժողությամբ բջջային հեռախոս գնելու դեպքում` նվեր«արծաթե» հեռախոսահամար, իսկ 100000 դրամ և ավելի բարձր արժողությամբ`«ոսկե» հեռախոսահամար:

«ԱրմենՏել»-ը երկարացնում է «Հեշտ քայլ դեպի Beeline» ծառայության գործողության ժամկետը

Administrator — Tue, 30 Nov 2010 23:06:17 +0000

«ԱրմենՏել» ընկերությունը (Beeline ապրանքանիշ) հայտարարել է «Հեշտ քայլ դեպի Beeline» ծառայության ժամկետի ավարտից հետո այն կրկին ակտիվացնելու հնարավորության մասին:

Ինչպես Մեդիամաքս-ին հայտնել են ընկերության մամուլի ծառայությունում, «Հեշտ քայլ դեպի Beeline» ծառայությունը գործում է 2010թ. օգոստոսից եւ թույլ է տալիս Beeline բջջային ցանցի նոր բաժանորդներին, ովքեր մինչ այդ օգտվում էին այլ բջջային կապի օպերատորների ծառայություններից, երեք ամիս ստանալ ծանուցումներ իրենց նախկին հեռախոսահամարին կատարված զանգերի վերաբերյալ:

«ԱրմենՏել»-ը երկարացնում է «Հեշտ քայլ դեպի Beeline» ծառայության գործողության ժամկետը

«Այն հաճախորդների համար, ովքեր ակտիվացրել են «Հեշտ քայլ դեպի Beeline»-ը օգոստոս ամսին, ծառայության ժամկետն արդեն ավարտվում է: Հաշվի առնելով դիմումների մեծ քանակը` ընկերությունն իր նոր բաժանորդներին հնարավորություն է ընձեռում անվճար օգտվել ծառայության առավելություններից` երկարաձգելով ժամկետը եւս 3 ամսով»,- նշել է «ԱրմենՏել» ՓԲԸ հասարակայնության հետ կապերի ծառայության ղեկավար Անուշ Բեղլոյանը:

«Հեշտ քայլ դեպի Beeline» անվճար ծառայությունը թույլ է տալիս Beeline բջջային ցանցի նոր բաժանորդին SMS-հաղորդագրության միջոցով ստանալ ծանուցումներ իր նախկին հեռախոսահամարին կատարված զանգերի վերաբերյալ: Բացի այդ, ծառայությունը զանգահարողին տեղեկացնում է հին հեռախոսահամարի փոփոխության մասին ձայնային եւ SMS-հաղորդագրությունների միջոցով:

Աղբյուրը` iTel.am