HTC-ն գրանցել է սմարթֆոնների վաճառքի անկում

HTC ընկերության մաքուր շահույթը 2011թ. 4-րդ եռամսյակում նվազել է՝ կազմելով 11 միլիարդ թայվանական դոլար (364 միլիոն ԱՄՆ դոլար)։ Այս ցուցանիշը 2010-ի 4-րդ եռամսյակում կազմում էր 14,8 միլիարդ թայվանական դոլար։

Վաճառքը դեկտեմբերին ընկել է 20,3%-ով։

Հիշեցնենք նաև, որ արդեն հոկտեմբերին ընկերությունը հայտնել էր, որ 4-րդ եռամսյակում սպասում է ցածր եկամտի արդյունքներ։ Սակայն վերջին արդյունքները ցույց են տալիս, որ HTC-ի 2011-ի ողջ մաքուր շահույթը աճել է 57%-ով՝ կազմելով 62 միլիարդ թայվանական դոլար։

HTC-ն աշխարհում սմարթֆոն արտադրողներից 4-րդ է, որը զիջում է միայն Samsung-ին, Apple-ին և Nokia-ին։

HTC սմարթֆոններ` առավել մատչելի գներով

ՎիվաՍել-ՄՏՍ-ի սպասարկման կենտրոններից HTC Desire Z-ը կարելի է գնել 220000 դրամով (նախկինում՝285000), HTC Desire-ը՝ 200000 (նախկինում՝ 265000) , HTC Legend-ը՝ 190000 (նախկինում՝ 235000), HTC Gratia-ն՝ 165000 (նախկինում՝195000) և HTC Wildfire-ը՝135000 (նախկինում՝ 155000)։

Ձեռք բերելով հեռախոսը բաժանորդները կարող են մասնակցել «Սմարթ բոնուս» ծրագրին և ստանալ սմարթֆոնի արժեքի 50 տոկոսի չափով բոնուս: Ապառիկ գնելու դեպքում ևս կգործեն նոր` առավել մատչելի պայմաններ:

HTC-ն վրդովմունք է հայտնել Apple-ի գործողությունների կապակցությամբ

Ինչպես հայտնում է 3Dnews.ru-ն` վկայակոչելով Digitimes-ը, HTC գլխավոր իրավաբանական խորհրդատու Գրեյս Լեյն (Grace Lei) ասել է, որ ընկերությունը ժխտում է  Apple ընկերության արտոնագրերի խախտման եղած եւ ներկա մեղադրանքները:

HTC-ն վրդովմունք է հայտնել այն պատճառով, որ Apple-ը մրցակիցների հետ պայքարում դատական հայցերի օգտագործման փորձն է նախընտրում, այդ թվում նաեւ HTC-ի հանդեպ` արդար մրցակցությամբ զբաղվելու փոխարեն:

Գրեյս Լեյն ասել է, որ HTC-ն «առանց փոխզիջման իր մտավոր սեփականության իրավունքները կպաշտպանի»:

Ամեն HTC անդրոիդի համար Microsoft-ը 5$ է ստանում

Պարզվում է, որ MIcrosoft-ին պատկանող արտոնագրերի մեջ կա տեխնոլոգիա, որը օգտագործվում է Android-ում, այստեղից էլ առաջանում են վճարումները: Եթե հաշվի առնենք, որ HTC-ն վաճառել է մոտ 30 միլիոն հեռախոս, ապա Microsoft-ը ստացել է բավականին կլորիկ գումար՝ $150 միլիոն:

Հետաքրքիր վերլուծություն PanArmenian.net-ի կողմից

HTC flyer Android Phone

Սմարթֆոնները հայտնվեցին հայկական շուկայում երկու տարի առաջ և գործնականում գրեթե անմիջապես տարածում ստացան Հայաստանի բնակչության շրջանում: Օրինակ, ըստ 2010-ի արդյունքների «Օրանժը» վաճառել է շուրջ 550 iPhone սմարթֆոն, իսկ ՎիվաՍել-ՄՏՍ-ը՝ մոտ 1000 սմարթֆոն:

«Օրանժի» վաճառքի գծով խորհրդատու Լաուրա Մկրտչյանը PanArmenian.net-ի թղթակցին տեղեկացրեց, որ ամենից շատ վաճառվում են iPhone հեռախոսները. «Մեկ ամսվա ընթացքում մեր սպասարկման կենտրոնում վաճառում ենք 2 blackberry, 12 HTC և15 iPhone: Հատկապես iPhone 4-ի համար վերջին երեք ամսում հերթեր են գոյացել»: Ըստ Լաուրա Մկրտչյանի iPhone ցանկանում են գնել միայն բրենդի համար, իսկ HTC և Blackberry սմարթֆոնները նախընտրում են գործարարները:

ՎիվաՍելը վաճառում է թե’ HTC, թե’ Nokia սմարթֆոններ, ինչպես նաև սեփական բրենդի ՄՏՍ սմարթֆոններ: ՎիվաՍելի վաճառքի գծով պատասխանատու Արփինե Պարոնյանը տեղեկացրեց, որ ամսական 60% վաճառվում է HTC սմարֆոններ, իսկ 40% Nokia սմարթֆոններ. «Քանի որ HTC-ներն աշխատում են անդրոիդ համակարգով, ավելի հարմար են: Nokia սմարթֆոններն HTC-ների ֆոնի տակ 2-րդ պլան են մղվել: Հաճախորդը գալիս է պատրաստված, ուսումնասիրած. արդեն գիտի, ինչ հեռախոս պետք է գնի»:

«Nokia» բջջային հեռախոսների կենտրոնի վաճառքի տնօրեն Վազգեն Բախշեցյանը տեղեկացրեց, որ ամենից շատ վաճառվում են Nokia N և C սերիայի հեռախոսները: Ամենամեծ քանակությամբ վաճառվել է nokia 5800 մոդելը, իսկ հիմա մեծ պահանջարկ ունեն symbian 3 համակարգով աշխատող C7, N8 սմարթֆոնները: Մեկ ամսվա ընթացքում Nokia-ն վաճառում է մոտ 100 N8 սմարթֆոն:

«Մարդիկ սմարթֆոն են ընտրում ֆունկցիաների` մեծ ծավալի հիշողության, լուսանկարելու բարձր որակի, հետո արդեն wi fi ինտերնետի համար, սակայն ոչ ծրագրային հնարավորությունների համար»,-ասում է Վազգեն Բախշեցյանը: «Օրանժի» վաճառքի գծով խորհրդատու Լաուրա Մկրտչյանն ասում է, որ աղջիկները նախընտրում են iPhone 3, քանի որ այն դիզայնով ավելի կանացի է, քան iPhone 4-ը. «Սմարթֆոն ընտրելիս հիմնականում ցանկանում են, որ տեսախցիկը լավ նկարի, զգայուն (touch) լինի, իսկ վերջում միայն Wi Fi ինտերնետին միանալու հնարավորություն ունենա»:

«Յունիքոմփ» ընկերությունը վաճառում է HTC և HP սմարթֆոններ: «Յունիքոմփ»-ի տնօրեն Արմեն Բալդրյանը տեղեկացրեց, որ վաճառքը բարձրանում է, երբ ստանում են HTC-ի նոր մոդելներ. «Մենք ամսական վաճառում ենք մոտ 50 HTC հեռախոս: Մարդիկ ավելի շատ նախընտրում են անդրոիդ համակարգով աշխատող սմարթֆոններ»: «Գնորդները նախընտրում են, որ էկրանը մեծ լինի, լավ որակով նկարի»,- ասում է «Յունիքոմփ»-ի սպասարկման աշխատակիցը:

Ապառիկի պայմանագիրը կնքվում է անմիջականորեն գնորդի և Յունիբանկի միջև

HTC սմարթֆոններն արդեն ապառիկ:

ՎիվաՍել-ՄՏՍ-ի և Յունիբանկի համագործակցության շրջանակներում այսուհետ ընկերության սպասարկման կենտրոններում վաճառվող HTC Hero և HTC Tattoo սմարթֆոնները կարելի է ձեռք բերել նաև ապառիկ` վճարելով հեռախոսի արժեքը մինչև 12, 18 և 24 ամսվա ընթացքում: Կանխավճարը կազմում է 13500 դրամ (HTC Tattoo) և 19500 դրամ (HTC Hero):

Ապառիկի պայմանագիրը կնքվում է անմիջականորեն գնորդի և Յունիբանկի միջև: ՎիվաՍել-ՄՏՍ-ի տարածած հայտարարության համաձայն` ընկերությունը գործարքի համար որևէ պատասխանատվություն չի կրում:

Աղբյուրը` ArmTech.am

Ինչպես ուրբաթ «ԱՌԿԱ» գործակալությանը հայտնեցին ընկերության մամուլի ծառայությունից, ՎիվաՍել-ՄՏՍ-ը հայտարարում է սմարթֆոնների համաշխարհային արտադրող` HTC ընկերության հետ պայմանագրի կնքման մասին և ներկայացնում է տեխնոլոգիական վերջին նվաճումներից մեկի` Android օպերացիոն համակարգի վրա հիմնված HTC սմարթֆոնները: Այս սարքերը շուտով կհայտնվեն ընկերության սպասարկման կենտրոններում:

Android համակարգի վրա հիմնված սմարթֆոնների շնորհիվ բաժանորդները կարող են օգտվել բարձրակարգ ինտերնետի ընձեռած հնարավորություններից և վայելել անհատական կարիքները բավարարող ծրագրեր Android Market-ի միջոցով։

Տվյալ ծառայությունների շնորհիվ շուտով հայաստանյան շուկայում հասանելի Android Market-ը թույլ կտա, օգտագործելով ՎիվաՍել-ՄՏՍ-ի հուսալի 2G (GPRS/EDGE) և 3.5G (UMTS/HSPA) ցանցերը, առավել արագ ներբեռնել բազմաթիվ խաղեր և այլ ծրագրեր:

«ՎիվաՍել-ՄՏՍ-ը մշտապես ձգտում է իր բաժանորդների համար ստեղծել նորարարական առաջադեմ տեխնոլոգիաներից օգտվելու հնարավորություն: Բջջային բարձրորակ արագ ինտերնետի ապահովումը ՎիվաՍել-ՄՏՍ-ի համար առաջնահերթություն է: Այդ իսկ պատճառով մենք չափազանց ուրախ ենք ներկայացնելու Android համակարգով աշխատող սմարթֆոնները Հայաստանում: ՎիվաՍել-ՄՏՍ-ի կողմից տրամադրվող արագ և հուսալի 2G և 3.5G ցանցերի շնորհիվ, հայաստանցիներն Android համակարգով աշխատող իրենց հեռախոսներով կարող են վայելել հաղորդակցության և ինտերնետի ընձեռած հնարավորությունները»,- նշեց ՎիվաՍել-ՄՏՍ ընկերության գլխավոր տնօրեն Ռալֆ Յիրիկյանը:

Android համակարգով աշխատող հեռախոսները հագեցած են բջջային ինտերնետի բազմազան հնարավորություններով, այդ թվում` Android համակարգին համապատասխանեցված Webkit բրաուզերով, ինչպես նաև` Google™, Google Maps™ և Google Search™ հնարավորություններով: Հեռախոսասարքերը նաև մուտք են ապահովում լայնորեն կիրառվող YouTube™:

ՎիվաՍել–ՄՏՍ-ը (Ղ-Տելեկոմ ՓԲԸ) Հայաստանում շարժական կապի առաջատար օպերատոր է, որը տրամադրում է ձայնային և տվյալների փոխանցման ծառայությունների բազմազան տեսականի: Իր հիմնադրման օրվանից` 2005թ. հուլիսի 1-ից, կարճ ժամանակամիջոցում ՎիվաՍել–ՄՏՍ-ը կարողացել է ստեղծել համահանրապետական ցանց և բաժանորդների զգալի բազա: ՎիվաՍել–ՄՏՍ-ը Հայաստանի շարժական հեռահաղորդակցության շուկայում նորարարական տեսականու և ծառայությունների զարգացման ու առաջարկի առաջատարն է:

«Բջջային Հեռահամակարգեր» ԲԲԸ-ն (ՄՏՍ) Ռուսաստանի եւ ԱՊՀ երկրների բջջային կապի խոշորագույն օպերատորն է: Դուստր ձեռնարկությունների հետ միասին կազմակերպությունը սպասարկում է ավելի, քան 97.76 միլիոն բաժանորդի: Ռուսաստանի 82 տարածաշրջանների բնակչությունը, ինչպես նաեւ Հայաստանի, Բելառուսի, Ուկրաինայի, Ուզբեկստանի եւ Թուրքմենստանի բնակչությունը, որտեղ ՄՏՍ-ը եւ իր դուստր ձեռնարկություններն ունեն լիցենզիա GSM ստանդարտներին համապատասխան ծառայություններ մատուցելու համար, կազմում է ավելի քան 230 միլիոն մարդ: 2000թ-ից «ՄՏՍ»-ի բաժնետոմսերը գնանշված են Նյու Յորքի բորսայում MBT ծածկագրի տակ:

Աղբյուրը` Telecom.Arka.am